立法會開埋下個星期三（8號）嘅大會之後就放暑假，焦點所在除咗毋忘六四嘅動議辯論外，仲有對打工仔有直接關係嘅9月3日抗戰勝利特別假期，只要下周三通過咗相關法例，打工仔今年就可以放多一日假。
不過無黨派嘅黃毓民靜雞雞喺限期前，針對呢條法例提出超過90項修訂。事緣毓民極度不滿特首梁振英何解要為咗抗戰勝利而放假，如果抗戰勝利要放假，咁其他重要日子，譬如九一八事變、七七盧溝橋事變等等又點解唔放假呢？毓民鬧爆梁振英只係做埋啲擦鞋嘢，擦阿爺鞋箒，所以佢要提修訂玩謝呢個特區政府。究竟毓民嘅如意算盤打唔打得響，即係佢啲修訂過唔過到關，就要等下周一（6號）秘書處回覆先至知。不過，八方相信點都好，今年9月3日嘅假期都放得成嘅。