廉署搗破大廈維修圍標集團，可以話係一眾小業主喜訊，但原來唔係棟棟大廈都咁開心，事關廉署前日篇新聞稿，話案件除咗涉及沙田翠湖花園同濱景花園，「土瓜灣華麗大廈」都有份。不過原來同一區有兩座「華麗大廈」，涉案嗰座喺土瓜灣下鄉道，另一座就喺紅磡老坑龍街，有部份傳媒就去錯咗紅磡嗰座影相同問業主回應，搞到法團主席噚日要搵區議員任國棟幫手澄清。
任國棟話，無論喺Google map定中原地圖搵華麗大廈，都只係搵到紅磡嗰座，要上到民政總署個網先搵到下鄉道嗰座，所以好多人都誤會。佢搵過廉署希望對方澄清，但廉署居然話英文版寫得好清楚涉案嘅係「Wa Lai」，而唔係紅磡嗰座「Wah Lai」，唔肯再澄清。