溫網女單爆咗幾日冷，周四就終於到男單爆，兩屆冠軍拿度以盤數1:3不敵德國籍、牙買加裔嘅德斯汀布朗，次圈byebye。而本身外形出眾嘅布朗，亦都靠今場一戰成名而人氣急升。（now670及671台今日6:30pm起直播第三圈賽事）
30歲嘅布朗，喺溫網開打前世界排名只係102位，今次亦要靠打外圍賽先殺到入主賽圈；喺周四之前職業生涯累積只係贏過四場大滿貫嘅佢，憑住進取打法以7:5、3:6同兩盤6:4贏咗拿度，繼前年之後再次打入溫網第三圈。
花名叫Dreddy嘅布朗，原來19年嚟冇剪過頭髮，先至造就今日咁長咁飄逸嘅dreadlock頭，都算佢忍得。至於輸波嘅拿度，貴為堂堂兩屆溫網冠軍，竟然連續四年入唔到八強。出名意見多多嘅美國名宿麥根萊，就勸拿度炒咗阿叔東尼，換過個教練喎。
另外，上年殺入四強嘅七號種籽華奧歷同11號種籽狄美托夫，分別以盤數1:3同0:3輸咗畀基治奧斯同加斯基，齊齊第三圈行人止步。
