立法會內會噚日開埋今個會期最後一次會，副主席湯家驊、資深法律顧問馬耀添，上次開內會已講明噚日唔會出席，得番內會主席梁君彥唱獨腳戲，但咁就出事，搞到開會「大甩轆」之餘，多次與泛民「開火」，八方聽聞不論官員同泛民，睇見佢嘅表現都覺「牙煙」，除擔心下年內會唔知點搞外，仲有人驚萬一佢喺2016年選舉後，真係頂替曾鈺成做大主席，到時叫人「膽破心驚」！
泛民：亂過亂世佳人
其實好多議員都話，以往內會開會尚算企理，湯大狀、馬耀添係有好大功勞，但建制派點肯認佢哋唔掂！
之前梁君彥仲話轉達建制派意見，唔要單仲偕、梁繼昌頂湯大狀做內會副主席，有泛民中人話，睇完梁君彥今日處理會議亂咁嚟，「如果冇單仲偕、梁繼昌頂住，出年開內會隨時亂過亂世佳人」。
傳梁君彥下屆做大主席
不過咁未算大件事，建制派一直盛傳，梁君彥是曾鈺成退休後，接替做大會主席人選之一，但𠵱家咁睇，由佢接任的話，正如白鴿黨卿姐同八方講，睇佢連延長會議，都可以唔問全部議員同意先去做，「如果你（梁君彥）第日做大主席，實好多人膽破心驚」。
梁君彥就搞到內會立立亂，但湯大狀冇你咁好氣，尋日喺facebook上載佢喺富良野睇薰衣草嘅相，但佢似乎仲未太放得低，留言話「過去二十個月，特別是最後這十個月，是我從政十一年以來，或許甚至在人生中最感困惑痛苦的一段時間」，八方希望湯大狀度完假返嚟香港，可以再次出發、忘記唔開心嘢。
李八方
mailto:[email protected]