財政司司長鬍鬚曾早前與國家主席習近平握手，突然人氣急升成為親政府陣營「集郵」目標後，經民聯立法會議員梁美芬噚日同傳媒茶敍時，就宣佈成功邀請鬍鬚曾，出席本月24日由佢老公王貴國主辦的「一帶一路」國際論壇，鬍鬚曾當日除咗主禮，仲會作開場致辭，梁美芬活動上則會同老公夫妻檔做主持。
梁美芬噚日強調，早喺鬍鬚曾「習握手」前，已發出邀請，最終鬍鬚曾喺6月13日一個關於鴨靈號帆船活動上，親口答應出席。
至於鬍鬚曾獲「習握手」後，係咪出任下屆特首的適合人選？梁美芬拒絕評論，話現時只想專注民生經濟，唔想講太多政治。梁美芬今次咁小心落注，唔知係咪因為政改表決集體離場甩轆後，仲有跟錯隊的心理陰影？