近年因為收入分佈不均（income inequality）、貧富懸殊，引起全球討論，一啲有關著作成為暢銷書。中國古語有云「不患寡而患不均」，我地嘅老祖宗孔子早已明瞭收入分佈不均帶嚟嘅社會穩定問題，只不過，三千年來，都冇邊一位智者可以提出理論與可行方案，將呢個「不均」問題徹底解決，有位思想家馬克思觀察入微，以為共產宣言係方法，點知共產方法在蘇聯、中國及其他地方實行以後，帶來之禍患及摧毀人性之副作用，遠遠超過資本主義，政治權力之「不均」而高度集中，對人類為害猛烈過財富之「不均」幾百倍，睇吓赤柬一段血腥歷史就知道咯。
我地講番如何在資本主義社會下，以資本主義手法解決不均，首先要明白「不均」之來源。美國聯儲局之量寬肯定係製造財富不均嘅機器，量寬刺激股市不斷上市，有錢有股票坐享其成，無錢無股票者就眼光光，自己身家有縮水，買股票者嘅身家就以倍數上升，「不均」程度日益嚴重。以前講脫貧靠教育，讀書成績好，考上大學，畢業後搵到份好工，一路順風順水，就可以幫助家庭脫貧，梁錦松、馬時亨係最佳例子，左丁山亦係走呢條路，脫離冷巷碌架牀生活。到了21世紀，大學生人數大躍進，呢條路似乎開始塞車，大學畢業搵工唔係咁易，搵到薪水好，有前途嘅好工更加不易。另一方面，大學畢業生人數多咗，平均薪水點都會有所提升，有助減低「不均」。
最近美國一份高檔雜誌The Atlantic發表咗一篇長達16頁（連廣告）嘅訪問，引起媒體重視，撰稿人受MSNBC電視台，拉利京（自CNN退休後，在網台繼續做節目 Politicking）訪問，成為傳媒話題，呢篇訪問稿題目叫做Recruitment, Resumes, Interviews : How the Hiring Process Favors Elites（招聘，履歷，面試；僱用過程如何偏幫精英），受訪者 Lauren Rivera，係名校西北大學Kellogg School of Management（即香港科技大學辦EMBA課程之合夥機構）副教授，呢位副教授平時研究大公司招聘過程，用咗一年時間訪問咗100位招聘負責人，跟隨招聘隊伍到大學校園展開招聘面試，追蹤一啲著名律師行，顧問公司，銀行如何決定聘請甚麼類型、來自甚麼學校嘅畢業生，最後寫成一本書叫做 Pedigree : How Elite Students Get Elite Jobs，內容要旨係搵工係「不均」inequality之開始喎。明日再講！