梁君彥搞到內會議程甩晒轆，八方聽聞背後仲有古仔！其實成班議員周五要開6個鐘頭財會趕工，已經好唔過癮，今次撞啱內務委員會多嘢要傾，副主席湯家驊又唔喺度，得個唔熟程序嘅梁君彥，於是泛民嚟個內會「暗拉布」，有藉口燒咗財委會時間，而建制派亦扮睇唔到，一於「暗爽」唔使開會開到11點！
泛民見噚日內會多嘢要傾，咪一於傾飽佢囉，傾到要加時好未？只要內會一加時，就可以逼財委會讓兩個鐘嘅時間畀內會再開會，當財會取消一節會畀內會開會，泛民用兩分鐘傾晒所有嘢！換言之兩個鐘會咁就冇咗！
其實泛民咁玩，建制派又點會睇唔到！有政府中人同八方形容，噚日咁嘅結局對建制派同官員都好，因為大家唔使咁夜收工！
就連財委會嘅主席張宇人，似乎因為太開心，高興到自掏腰包請大家食最潮嘅Lady M千層蛋糕。