食物安全及環境衞生事務委員會嘅主席張宇人，噚日希望徵求立法會內會同意，批准委員會前往美國訪問，研究美國美食車營運同規管進口食品方面經驗，預計9月13至19號起行。建制派、民主黨同民協馮檢基、衞生服務界李國麟認為外訪有必要，但唔少泛民就認為今次去美國只為睇美食車，做法相當無謂。
其中社民連長毛梁國雄就鬧，美食車建議只係鬍鬚曾喺預算案簡單提過吓，一眾建制派喺習近平同鬍鬚曾握手後，就視之為「神仙放屁」，浪費時間同公帑話要去外訪。公民黨Miss Mo亦話，覺得今次外訪團畀公眾印象好差，「有乜嘢係遙距學唔到，一定要親身去睇？令人覺得呢個唔係考察團，係旅遊團多啲」。雖然有議員鬧爆，最終內會仍以33票支持、13票反對通過動議。