NBA夏天自由轉會窗七月一號（周三）啱啱重開，雖然根據聯盟條例，所有交易同續約事宜都要去到九號（下周四）先可以正式落實，但係轉會窗重開嘅第一日已經交投活躍，有超過20位球員同球會傾掂數（見附表），決定好未來去向。
其中一單比較多球迷關心嘅，就梗係37歲嘅「真理」皮雅斯（Paul Pierce、圖）加盟快艇，暫時仲未退休住啦。17年職業生涯入面先後效力過塞爾特人、網隊同巫師嘅PP，來季終於會返番老家洛杉磯，去快艇幫恩師李華士（Doc Rivers）教練打江山。PP將會同快艇簽三年總值1,050萬美元嘅合約，而最後一年就係球隊選項。
路夫撰文證留騎士
另一邊廂，應屆東岸冠軍騎士亦傳出喜訊。去留一直成為焦點嘅全能大前鋒路夫（Kevin Love），周三就寫咗篇百幾字短文自白，以「未完成嘅事業」嚟宣佈來季會留喺克里夫蘭，佢仲話總決賽Game 1以觀眾身份睇完班隊友搏殺之後，已經決定要續約留效喎。除此之外，路夫仲講笑咁話「大帝」勒邦占士（LeBron James）嘅「泳池策略」有效㖭。