金庸《神雕俠侶》名句：「俠之大者，為國為民。」內地長江證券曾用來起題，發表《為國接盤，俠之大者》報告，呼籲散戶撈底，成為股壇笑話。中央連出十二道金牌都救唔番A股，內地華夏保險噚日發表聲明：「堅決支持救市，已大舉逢低建倉」。為國護盤原本只是笑話，竟然成真。
阿爺落order，基金大戶當然要識做，起碼口頭要表忠心。喺禮拜二，中國基金協會發表公開信，話基金會與散戶同舟共濟，一定唔會沽貨。同日又發表內地13位私募基金大佬言論，齊唱好A股。
問題係，A股連瀉不止，到底係邊個掟貨？今年5月以來A股出現有史以來最大規模減持潮，帶頭掟貨都係匯金、央企等國家隊，基金又點會唔跟手沽。大戶講一套做一套，想當散戶係傻仔，搞到人心惶惶。
黃尹華