大台黃金檔兩線劇被內地劇重重包圍，亞視冇嘢睇，焗住睇大台內地劇，大導王晶8點半套《風雲天地》第一日收視係高開報捷，平均有26點（即168萬觀眾），最高有28點（即181萬觀眾），不過播出後即刻被網民揶揄係非一般膠劇，除咗劇情膠，連主角都一樣咁膠，所以收視係咁跌，上個星期五播第五集仲一度跌到20點（即129萬觀眾），冇咗8點，即大約流失52萬觀眾。
7.1回歸之前最新收視數字顯示《風雲天地》平均有22點（即142萬觀眾），係低過本地創作嘅長壽劇集《愛．回家》，王導當日喺微博吹噓劇好不怕被抹黑，自信會招來四方客，此言差矣！數字勝於雄辯。
內地新劇趕殺青
膠劇播咗9集收視直瀉，宣傳告急，有報道就話男主角劉愷威謝絕宣傳，連王導出馬都冇符，身在橫店拍新劇《寂寞空庭春欲晚》嘅劉愷威透過WhatsApp話：「一直盡力跟這邊的劇組度期回來做宣傳，但很可惜，因為這邊也在趕殺青，所以一天時間也沒有，晶哥和TVB都很體諒很理解，所以並不是像其他報道說的那樣。」
對於《風雲天地》收視下滑，有人話覺得唔係好啱香港人口味，佢話：「我覺得自己盡了每一分力就可以了，至於成績是怎樣有很多不同因素影響。」
撰文：馮仁昭
