剛送走咗華裔NBA球星林書豪，下星期又輪到90後塘鵝嘅「一眉道人」安東尼戴維斯（Anthony Davis），佢將於下周二（七號）首次訪港，兩個咁啱得咁蹺，都係住喺同一間麗思卡爾頓酒店，熟路嘅球迷應該好易搵，而且一連三日嘅活動（見附表），有唔少埋身位，今次仲會有香港拳王曹星如同佢同場，球迷同拳迷都唔好錯過喇！
年僅22歲嘅一眉上季打出攻守兼備嘅全能表現，結果喺傳媒投票中成為MVP第五名；好有潛力成為聯盟未來「第一PF」嘅佢，全季代表作應該係二月初對雷霆嗰場，射入球三分絕殺fadeaway幫塘鵝險勝116:113，而最終兩隊同樣錄得45勝37負嘅常規賽戰績，塘鵝就靠較佳對賽成績贏咗tiebreaker，幾經辛苦先至攞到西岸寶貴嘅第八張季後賽入場券。
塘鵝首圈俾總冠軍勇士以直落四場橫掃出局，但一眉喺個人季後賽處子戰攻入35分，媲美傳奇中鋒「天勾」渣巴（Kareem Abdul-Jabbar），前途真係無可限量。有見及此，雖然佢同塘鵝嘅合約仲剩兩年，但係球隊想盡早綁實呢位未來超級球星，喺周三夏天自由轉會窗重開之後，已經嗱嗱臨同佢傾好晒續約條件；一眉將會動筆簽五年總值1.45億美元（約11.2億港元）、聯盟史上最豐厚嘅合約，若然下年再做到明星賽正選或者入選最佳陣容，仲可以有額外獎金㖭。
兩年前，曹星如喺暑期曾經同拜恩（Kobe Bryant）齊齊出席活動，今次呢位香港拳王下周四（九號）亦會喺旺角嘅籃球專門店內同一眉見面，仲會一齊玩遊戲，星如話好期待：「我知道佢出名防守同體能一流，我自己係主攻型，都想同佢交流吓點做好防守。」今個月18日會喺威尼斯人爭取職業生涯第17連勝嘅星如話，賽前同唔同領域嘅球星見面，可以令自己輕鬆一吓。
落彩虹邨打街波
一眉今次訪港行程為四日三夜，期間會去彩虹邨街場同香港基層小朋友打波，之後又會去旺角同過海去修頓跟小朋友互動，想捕獲佢嘅球迷，可以去呢幾處碰碰運氣。
