韋斯咸、倫敦四哥，今季搶住出閘，季尾又會搶住關門，舊球星、新波士比歷被寄予厚望，但「槌仔」球迷，都係放鬆啲好。
球壇兩大天王，C朗啱啱喺巴哈馬群島同個寶貝仔度假，享受陽光與海灘；美斯等一眾南美球星就好慘情，七月都仲未收「咧」，準備周末亮相美洲國家盃決賽；不過「槌仔幫」韋斯咸幾位主力，搶閘喺愛爾蘭開操咗個多星期，要同一班青年軍隊友踢歐霸盃外圍賽第一圈。
早開季難捱到季尾
先出場，唔係好兆頭；對上五季，利物浦（兩次）、富咸、史雲斯同上季嘅侯城，呢類率先亮相歐霸盃嘅英超隊，唔知係咪要絕早開波嘅緣故，喺該球季聯賽都踢得唔太好；強如利記嗰兩次喺同屆都攞唔到聯賽前五名，緣盡翌季歐洲賽；上季打頭陣嘅侯城仲慘情，降班收場。
出到600萬鎊年薪搵賓尼迪斯，槌仔幫都被請食檬檸；90年代做過槌仔中堅18個月嘅比歷，平一半人工都肯教，又唔代表唔得。呢位克羅地亞人嘅三年聘約條款列明，如果降班，一毫子都冇得賠，老闆咁緊張，只因來季踢埋尾二嗰場聯賽主場鬥史雲斯後，就會搬離用咗過百年嘅烏普頓公園球場，正式搬入恨咗好耐嘅奧運場館做主場；到時規模同阿仙奴同級，一樣坐六萬人，勁過車仔同熱刺，倫敦四哥「升呢」喇！
李斯特城2002年由費拔街公園球場，搬去獲加碗（現在已改名為皇帝力量球場）後，呢十幾年大部份時間唔喺英超；阿仙奴06年由高貝利搬去阿聯酋球場後，未攞過英超錦標，所有嘢要重新適應，未必能即時合乎球迷期望。
幸好，韋斯咸主場威力一向麻麻，近三季回升英超後，勝率僅逾三成，郁吓都唔算係壞事；比歷今季任務，除咗為球會「保命」外，就一定要踢出比前度「大Sam哥」更悅目嘅足球。
球隊近屆嘅球會最佳球員，全由中後場奪得，上季最佳係左閘艾朗加斯威爾、第二名係門將阿祖安卡斯迪路；對上一次有前鋒攞獎，數到07年由泰維斯同森莫亞得一、二名。比歷來季應該會改踢潮流興嘅4-2-3-1陣式，留得住桑治，同新兵奧比安打雙防中；至於28歲嘅上屆法甲助攻王皮耶，用成1,100萬鎊購入打攻中，風險唔細，法國兵近年喺英超影響力大降，呢個年紀唔容易再重新適應英超壓迫性踢法。老闆出得起600萬鎊斟賓帥、安察洛堤教波，比歷一上任會感受到巨大壓力。
捱得過呢季，比歷呢位熱愛搖滾樂嘅Rock友，大可喺奧運場館開番場演唱會先，同槌迷慶祝「升呢」喎！
文：波神