賽後檢討呢樣嘢呢，唔同陣營都會搞，好似早前建制派政改投票甩轆後，都死死地氣放低不和，約個會檢討死因。前日7.1遊行人數創梁振英上任特首後新低，有泛民中人都私下話要檢討到底係咪年年都要7.1上街？抑或儲埋子彈蓄勢待發，等有大件事先行？花生友唔知以上建議，支持定反對嘅人較多，但相信大家有共同意見，就係新一哥盧偉聰前日會好開心，因為佢上場後首個7.1和氣收場。
每年7.1，警方都會不時因為遊行嘅封路問題、人流管制等同遊行嘅市民有衝突，但前日嘅7.1遊行，大家有冇發現，在場嘅警員好鬼寬容，唔似以前咁成日阻撓隊伍前進，亦好順攤畀參與者中途插隊。
左派轉低調 潑水節難產
有泛民中人分析，可能因為遊行人數確然係少，所以警方都開晒綠燈，覺得大家盡早行完，好過拖到大家心火盛，有乜衝突就唔好，但亦唔排除呢種開放作風，係同換咗一哥有關，佢話前一哥曾偉雄屬鷹派，下屬都跟足佢條硬路線，但盧偉聰做過政治部，點會唔知懷柔係亂世下嘅上策？話唔定落晒柯打，7.1遊行要用軟招免出事？
與此同事，愛國愛港陣營今年7.1亦搞大巡遊喎，過往都試過左派同激進泛民支持者路上相遇，難免又有衝突同口角，而左派今年轉低調，已經幫手減低對警察分開兩大陣營時處理手法嘅不滿，而且前日明明有本土派話要去旺角大媽演唱地搞潑水節，外界預咗會爆大鑊，點知最終又難產收場，警方輕輕鬆鬆收隊，所以有泛民同花生友講笑，唔知係咪因盧偉聰腳頭好？
花生友