近期中央對股市定調為慢牛，一下子衝上5000點，阿爺出手控制兩融，個市未穿4000點嘅時候，阿爺漏夜出招，即係話4000點並唔係阿爺想見到，代表乜嘢？救市陸續有嚟囉。中港股市隨着6月第三個星期，不明朗因素逐一消退，傳說中嘅6月大跌市可以告一段落，點知，希臘突然走數，完全破壞咗中央為7翻身作嘅準備，減息之後，大市連半日都無得炒，搞到中央七一漏夜出招。
當大家以為阿爺再出招，個市應該有反彈，點知滬綜指再跌多3個巴仙，聞說係國家隊接貨咋，如果唔係分分鐘劈足6個巴仙，收市之後，更加有傳聞話中央徵求救市良方，內地《新浪財經》昨日出現新欄位名為粉碎謠言機，情況雖然都幾嚴峻，但阿爺救市意志堅定。
既然救市意志堅定，剩低嘅只係救市方法，減息之後，再連出三招都谷唔起個市，咁阿爺會唔會技窮？筆者認為，而家阿爺仲未去到技窮嘅階段，起碼減少新股應已幫到手，再唔係咪減下印花稅，唔畀大股東亂咁沽貨套現，個市大把方法可以刺激到，問題只係在於阿爺點睇個市。
流氓