恒大地產（3333）老闆許家印同阿里巴巴主席馬雲一樣，瓣數多多。恒大除咗產，連農業、畜牧、糧油、嬰兒奶粉、礦泉水都有沾手，噚日恒大就一口氣宣佈，將旗下足球隊與文化產業兩瓣業務，分拆喺融資能力有限嘅內地新三板上市，突然咁急進，唔通許家印好趕住抽水？
恒大嘅足球隊正正就係同阿里合資嘅「廣州恒大淘寶足球俱樂部」，呢間公司業績認真麻麻，2014年虧蝕4.8億人仔。呢隊波舊年6月嗰陣，估值24億人仔，聽聞今次上市目標估值超過100億人仔，1年唔夠升值咁多，唔係吖嘛？
至於主力做文化娛樂、影視製作嘅恒大文化，財政狀況就好少少，舊年賺8.8億人仔，但大部份都係公允價值賬面收益。不過大家最關心許家印將佢哋上市後，又有乜花臣啫，佢加埋馬雲，真係「估佢唔到」嘅組合。