傳心術、用雷射光傳送訊息等，如果普通人講就俾人當儍瓜，但由facebook創辦人朱克伯格講嘅，就分分鐘會成真。
朱克伯格近日喺fb專頁舉行問答大會，同網友講到未來科技發展，就講咗5個預言。佢話，未來透過虛擬實境科技，人類可能足不出戶都可以去旅行、同人見面。舊年fb收購咗虛擬實境科技公司Oculus，近年積極研發通訊用途，睇嚟朱克伯格嘅預言好快實現。
朱克伯格又話未來可能唔使講嘢，用腦電波就可傳送想法、感觀同埋情感。咁人類係咪可以進化到好似嗰隻卡通貓咁冇嘴呢？
著名物理學家霍金與影星阿諾舒華辛力加都有提問，霍金問朱克伯格有乜科學問題想知？朱克伯格話，想知人類會否長生不老、腦部點用等，仲話認為有數學法則可以解釋人類社交關係，果然係社交網站創辦人。
曾飾演未來戰士嘅阿諾就問機械人會唔會贏，朱克伯格就斬釘截鐵咁話唔會。
朱克伯格仲期望人工智能可以幫盲人睇到嘢，同時估計未來可用飛機、衞星等發放網絡，用雷射光傳送數據同訊息㖭呀。