自由黨榮譽主席田大少噚日接受完卿姐訪問透露，早前撰文同佢隔空開火的親細佬、新民黨議員田二少，早前同大佬喺一個飯局碰頭，席間話「我係作為細佬同你道歉」。田大少覺得細佬咁講，似乎仍然覺得自己早前撰文，批評建制派就政改投票「道理上無錯」，但點都好，佢覺得告一段落，笑指相信只有兩名「蠢蠢哋」的建制派議員嚟緊「人頭落地」。
除咗同細佬撐枱腳，據知臨近今屆立法會會期結束，田大少又會同一班建制派議員食餐飽，餐廳由早前「潮州人」民建聯陳鑑林建議的上環尚興，變成近日的中菜館灣仔生記，田少已準備當日送出一支巨型紅酒贈興，餐飯就會由經民聯議員石禮謙找數。田少仲早已訂好今個月12號機票，準備同班孫仔去夏威夷10日，所以近日已表明反對立會喺今個月已加開兩日會議，喺10號後再加會，話相信唔少議員都會反對呢個苛政喎。