半島酒店嘉麟樓嘅奶黃月餅，近年好受歡迎，內地人當然炒埋一份啦，仲話係月餅界裏面嘅勞斯萊斯㖭。半島今日就正式出咗價單，一盒8件月餅售485蚊港幣，價錢同上年一樣。市民喺8月24至28日可透過半島網上平台訂購，每次最多限訂20盒，到9月6至26日去嘉麟樓攞月餅。
舊年嘉麟樓月餅被炒高至一盒800幾蚊，之後當然炒燶咗，有炒家仲要比正價平10蚊蝕賣。點知今日淘寶仍然有人開咁高價，一盒由338人民幣（約422港元）到688.88人民幣（約860港元）。成860蚊盒月餅，每件要過百蚊，高過正價逾七成，網站仲顯示有一單成交，信不信由你。