成日做做做，忙到就爆煲，做運動、打機係法寶，但打工仔每分每秒都咁寶貴，邊有咁易行得開？科健籽搵咗美國的人生教練Tom Casano醒你幾個小貼士，助你一分鐘內極速減壓，重新出發。
遠離自己部電腦，搵個空位聽下歌，跳下舞，身體狀態轉變，精神狀態都會隨之改變，不過梗係搵個大少少的空位，而未必影響大家的位置翩翩起舞，否則會嚇親同事。
大笑時，腦部釋放胺多酚（Endorphin），搵個有幽默感的同事吹下水，如果壓力太大笑唔出，可以去YouTube搵下棟篤笑片睇吓。
𡁻香口膠，可𡁻走引致壓力的荷爾蒙，其效用已有科學研究證實，如果冇香口膠喺身，軟糖或薄荷糖一樣work。
抱抱原來都有用，當你擁抱一個人時，大腦會釋放催產素，降低引致壓力的荷爾蒙，不過只限身邊有你信任的人先啱咁做，如果你突然攬住一個唔相熟的同事，壓力帶不走，仲會惹來一身蟻。
頭腦閉塞時，索索香味醒神番，喺香薰治療中，有研究顯示薰衣草最有效，切片新鮮檸檬或薑，都能幫你冷靜冷靜。
深呼吸五下，每下維持數秒，紓緩神經系統，令腦部增添氧氣。
記者：梁慧琳
資料來源：《Huffington Post》