任職於醫管局嘅新亞新聞系師妹張宏艷來電，告知第七屆中大新聞獎已經開始接受報名，截止日期係七月十日。搞中大新聞獎，左丁山記得係自2003年開始，每隔一年搞一次，即2003、2005、2007……至2015就係第七屆，當年係為咗慶祝中大40周年校慶而諗出嚟嘅「新意思」，左丁山雖非新聞系中人，但叫做曾經考入新聞系得到取錄而唔入讀，俾魏大公博士鬧過一輪，對新聞系幾有感情，又勢估唔到人生下半場係半個新聞界呢，故此2003年中大新聞傳播學院籌辦呢個新聞獎時，左丁山參加過籌款工作。
新亞書院於1965年創辦新聞系（兩年制，中大學生在二年班可考試入讀，由三年班開始），得十幾個學生（1967年有六個畢業生，即莫圓莊、倫兆銘、陳潤營、陳崇業、洪若豪、梅寬），後來改組成為四年制，再擴大至中大新聞傳播學院，學生數以百計，係創辦時想唔到嘅。
今年啱啱係新聞系創立50年，辦第七屆新聞獎，有特別意義，新聞獎歡迎全港新聞媒體人士報名參加，分五個獎：（一）最佳新聞獎（報章/雜誌）、（二）最佳專題獎（報章/雜誌）、（三）最佳新聞獎（電視）、（四）最佳專題獎（電視）、（五）最佳新聞/專題獎（電台），請上alumni.com.cuhk.edu.hk/cuja2015下載報名表格。
參加比賽，最緊要知道由甚麼人組成評判團，睇吓名單就可以評估評判團是否公正公道。呢，今屆中大新聞獎評判團陣容夠晒鼎盛，行內阿哥阿姐齊晒，各派別都有，保證夠平衡，包括蘋果葉一堅，DBC羅燦，有線趙應春，商台陳淑薇，TVB袁志偉，NOW張志剛，港台馬文敬，大學新聞系代表有梁天偉（樹仁），黃煜（浸大），馮應謙（中大），皇甫河旺（珠海），報紙有陳早標（經濟），郭艷明（信報），李永康（都市），盧覺麟（am730），公關界有曾立基（中大新傳校友會主席），如果左丁山有作品參賽，都會話呢班人夠晒資格，得佢地大多數通過而得獎，肯定實至名歸。評判團會按照作品內容，表達技巧，及社會影響呢三大標準嚟評審，目的係透過表彰優秀新聞工作者，為樹立業界良好榜樣，提升香港新聞專業水平。每位大獎得獎者可得5000元獎金及紀念座，年底由中大校長沈祖堯頒獎。