屬於全港頂尖嘅「紅酒專家」唐英年，噚日出席位於ICC 101一家貴價食肆嘅新店開幕，教大家平日品嚐鮑魚、遼參、炸雞、魚翅應該點樣配搭名酒。不過，唐唐話，為咗響應環保，佢10幾年前原來已經唔食魚翅，但如果真係對方請到埋嚟，有時都惟有「食住先」，免俾人話佢唔畀面。
唐唐話，鮑魚由於太濃味，所以要配飲同樣濃厚嘅Bordeaux紅酒，佢介紹嘅Brane Cantenac口感濃、味道重，足以蓋過鮑魚嘅濃味：「買2006、2007年，幾百蚊已經可以買到一支，我好鍾意呢個配搭。」
澳洲酒配炸雞
至於遼參，唐唐話佢一向都鍾意配Pinot noir，講明唔使買貴嘢，只係200蚊左右一支，仲話試過用嚟請過傳媒飲，唔少人都讚不絕口，呢支Pinot noir就係Faiveley Mercurey：「呢支酒好甘香，好有花香，味道唔係太濃，令人回味。」至於全智賢最喜歡食嘅炸雞，唐唐話，韓劇教曉大家炸雞應該配啤酒、燒酒，但其實可以試吓配澳洲嘅Grosset Polish Hill Riesling，「呢支酒係好dry，配炸雞最啱」。至於魚翅，唐唐雖然10幾年前已經冇食，但如果真係要叫佢配，就應該配香檳：「因為魚翅味道清淡，襯香檳係一個好嘅balance。」
但唐唐話，口味因人而異，「全世界60億人，你自己嘅口味係獨一無異，乜嘢好飲、唔好飲，都係睇你自己口味。靚酒未必一定係好酒，平酒亦毋須嫌棄，一樣有好多平酒係好好飲。」
李八方
mailto:[email protected]