立法會鐵路小組今日開會討論高鐵工程最新評估。可以預見，議員不論黨派都會鬧爆。原定𠵱家應該完工通車嘅高鐵香港段，推遲到至少要2018年第三季先搞掂，造價更大升至853億元，超支成203億元。呢隻大白象一再超支延期，加上一地兩檢仲未解決，輿論形容係黑洞深淵，絕不為過。
究竟個深潭見底未？853億係咪最後數字？港鐵消息話，853億係根據目前資料最合理、最貼近事實嘅估算。但會唔會過一年半載又話加到1,000億㗎？對方苦笑話，如果係咁，繼韋達誠之後，現任CEO梁國權隨時人頭落地。
事實上，西九總站同鑽挖隧道工程雖分別完成七成同九成，溶洞等問題亦已克服，但仍有不少挑戰。例如米埔段濕地搞不好會出現「沉洞」（sinkhole）情況。港鐵千夫所指，連局長張炳良日前都鬧持續超支不能接受，追究港鐵責任。但有人認為，政府冇可能講到唔關自己事咁款，好似工程勞工短缺，港鐵至今透過補充勞工計劃只曾輸入50個工人咁大把，政府呢方面係咪可以做啲嘢呢？