外國電訊商之間的廣告戰可以玩到幾大？美國第三大電訊商Sprint，唔單止搵咗「萬人迷」碧咸做宣傳，仲串盡當地其他競爭對手的月費計劃複雜麻煩。
話說萬人迷有日想出部手機，同埋要無限上網計劃。佢先去T-mobile門市問價，但係職員先同佢講限量服務，之後再同佢講「1GB無限計劃」，搞到碧咸頭都大：「點解又1GB又無限？」店員先解釋，用盡1GB後會被限速，要包手機仲要加錢，結果碧咸好心灰咁離開。
之後有人見到碧咸買手機，於是跟住佢一齊買，而碧咸之後去埋其他電訊商，包括AT&T及Verizon等，但前者話今個月用唔晒的數據，可以下個月再用，但都唔係萬人迷想要的無限數據服務；另一間收費太貴，最後碧咸都買唔到手機。
結果，佢搵到Sprint，只要每月80美元就可無限任用數據、電話同短訊服務，仲包埋iPhone同Galaxy S6等旗艦手機畀佢揀，收費簡單兼平過隔離台，令到碧咸（同班跟住佢買的人）好稱心滿意咁買手機上台。
雖然Sprint話一個月費就可以人任用數據，上台都要先畀36美元啟動SIM卡，用戶睇片時將會限速至600kbps，但畀到用戶一個簡單直接的收費服務。唔知香港電訊商幾時會推類似服務，同埋請返梁朝偉同埋周潤發拍廣告，玩返舖勁？