【7.1大遊行】
【本報訊】密密麻麻的腳步，穿過最具藝術氣息的佔銅區，回到人氣最沸騰的夏慤村，那無法磨滅的曾經。輕盈的線織在柏油路上，連結劍拔弩張的79個日與夜，通向700萬人未知的明天，4.8萬人，收拾傘後的心靈碎片，懷着「等埋發叔」的笑意，以滴水穿石的意志，再次踏在7.1路上要求重啟政改，盼望一切從今天開始。
記者：張嘉雯
人們交投接耳，圍在有樹蔭的外圍，搖着扇說今年來維園的人比以往都少。下午3時，烈日焦灼如昔，維園足球場好幾個還是空蕩蕩，已經汗流浹背、從事資訊科技行業的陳先生說起遊行的因由，「唔發出聲音，咪更加冇用囉，到時報紙又唔報道，大家慢慢就習慣唔啱變咗啱，習慣咗嗰種黑暗」。
起步了，下午3時半，寫有「建設民主香港、重奪我城未來」的巨型橫額由維園出發，穿各式T恤的巿民在軒尼詩道西行線和電車路前進，行人路旁是連綿不斷的街站，由普選、三跑、護鯊、同志、動物、土地、戒賭、勞工，甚至煙民權益，百花齊放，猶如社會議題上河圖，泛民、民間團體和本土派，在自家搭製的台上高喊口號，沒有互相指罵。有巿民說人少了，終於可以窺見各街站的風光，領單張、捐款，從從容容。
「唔遊行就真係冇壓力」
偶然有人領叫口號，當然少不了「梁振英下台」，路旁有團體唱雨傘主題曲，人們撐着傘拍着手，平靜道出心底願望，「梗係要真普選，無論（遊行）有冇效，堅持落去先，如果有啲好啲（方法）咪做囉，如果冇嘅咪做住𠵱家嗰啲先囉」。和家人多年來參與7.1遊行的鄺先生認為遊行有意義，「每年都仲要出咁多警察，如果唔遊行就真係冇壓力喇」。
和女兒自回歸後一直參與7.1的何小姐，對中聯辦近年屢次干預香港政事極為不滿，「係咁踩落嚟，真係點忍呀？我幾廿歲喇，希望重啟政改五部曲啦，遊行有用㗎，雖然689當唔知，但希望中央有一日睇到我哋做緊乜，政改係𠵱家先至開始咋」。
任職工程師的阿康，也不認為否決政改方案是終點，「否決咗個假方案，但未推翻8.31定論，我都要重啟政改，全部香港人一齊簽，唔好淨係話支持，但喺屋企，一定要用對腳嚟行，多啲人支持反8.31，大陸先會再考慮吖嘛，個個做鵪鶉唔出聲嘅，死梗㗎喇」。
退休警轟政府鋤弱扶強
同樣在遊行路上的，還有退休警察林先生。他認為港人生活較回歸前要苦，民生問題要關注，「做生意嘅，唔係親建制就冇運行，政府幫有權有勢嘅人，鋤弱扶強，剝削大眾，順我者生，逆我者亡，後生仔有開工冇收工，所以我仲要出嚟」。他指警隊內雖不乏良心之士，但部份人愚忠無知，他和舊同事已甚少來往，「冇證冇據又拉又鎖，七警打人單嘢，正常程序第二朝都過堂啦，點解會𠵱家超過半年都未有任何行動呢？」
民陣宣佈超過4.8萬人參與遊行，是自2008年以來最低的紀錄。民陣召集人陳倩瑩指人數雖比預期少，但仍然滿意，相信人數少與沒有逼切議題有關，希望港人不要放棄，認為堅持才看到希望。港大民意研究計劃則公佈，7.1遊行總人數應介乎2.7萬至3萬人。警方估計高峯期有19,650人。
特區政府回應遊行時表示，修改《基本法》的訴求不符合香港的利益和福祉，又重申政改方案已被否決，現屆政府未來兩年內，均不可能重啟五部曲的程序。
七一大遊行：
http://71.appledaily.com