回歸日第三場一班草地千二米，出現冷場只六駒上陣，跑第三冇位置派彩，亦冇位置Q彩池，只要唔係包尾，馬主及騎練都有獎金收。結果馬少少大熱門「新力風」卻前四名不入。
近排畀大摩、蔡約翰掟甩咗之方嘉柏，這場反擊得手，憑「豪逸」打破守齋三期齋缽，累積57win仍落後大摩6場。「豪逸」季初由蔡明紹爆過冷win，呢場磅位太輕用唔到柏寶，最終人馬故劍重逢，蔡明紹交足功課，留到最後200米左右，將座騎撻着逢馬過馬，拋離沿欄放頭之「醒目波幅」勝出，5.6倍綠燈win手到拿來，「豪逸」成為繼「十二門徒」同「控制者」後，方廐今季第四匹四捷馬，人馬合作兩次保持不敗。
「醒目波幅」在黃皓楠胯下頂住後面追兵跑第二，第三名由方廐另一駒楊明綸之「天合」影贏「恩格斯」拎到，六駒場合開華將三重彩。賽後「豪逸」馬主呂卓恒冇亮相，由細佬呂卓基及父親喜萬年酒樓老闆呂少文代拉頭馬。
今場最肉酸是大熱門「新力風」，六駒場合出閘不慢，早段被韋達拖到最後，全程四五疊，蝕位太多及失先機下，2.2倍僅跑第五。