呢輪世界各地的fb、Twitter、社交平台，幾乎都被七色彩虹攻陷，唔少品牌都換上彩虹Look。有人叫好，有人喊呃Like，人抽你又抽，似乎無厘新意。但我認為，呢次抽水，抵讚！呢個可能係人類史上第一次，有咁多個品牌集體化彩妝，一同慶祝一件歷史大事。
抽水抽到連品牌Logo都轉色，絕對唔簡單，唔好以為係Marketing或Corporate Communications阿頭一時貪過癮，湊下熱鬧，人轉我又轉。轉色，技術上係就係click幾下電腦就可以做到，但背後其實充滿學問。
做品牌，天子第一號教條是Brand Consistency（品牌一致性），Logo是甚麼顏色，甚麼字款、襯甚麼背景，是有指定戒條，改不得，這就是行內所謂的Corporate Identity。品牌越值錢，形象越受重視，規限也越嚴苛。呢個世界，我敢肯定沒有一間公司的內部Corporate Identity指引，會教你甚麼時候出現甚麼社會突發大事，可以將Logo轉色，更加唔會想像到同志婚姻合法化後，會容許Logo變到五顏六色。
此舉看似簡單，其實是making a very bold statement，向外宣佈，品牌擁抱大愛價值，支持人權平等，有heart兼有sense。過去品牌變色，見得最多，一定是死人的時候。好像新加坡前總理李光耀去逝，不少在新加坡落戶的品牌Logo一夜變黑；又好像之前航空公司墜機後，品牌Logo立即變黑。今次，全球轉色、齊歡唱同慶賀，的確前所未見。
其實，品牌就好像一個有血有肉的人，有獨立性格，有喜怒哀樂，見到死人會哀慟，見到革命成功會振奮，在Social Media年代，品牌跟你和我和他和她一樣，愛玩fb，會上Twitter，會發Instagram，當你會轉相支持LGBT，它們也會利用一張相、一個post，來個表態。
當然，呢個世界上有更多的品牌，永遠係食古不化，只識做井底豬，從不知世界已經變了色，即使知道，自己也不敢變，恐同恐公義恐政治，寧可少做少錯，唔做唔錯。香港品牌，可能就是欠缺了一種世界觀、更人性一點的氣度，所以連落場參與也費事！
文廸晞
mailto:[email protected]