呢期特區冧巴溫紅人，肯定係財政司司長曾俊華，佢早前代表香港到北京出席由中國牽頭成立嘅亞投行創始典禮，突然獲國家主席習近平喺一眾外國貴賓中，眾裏尋他送上第一握，令鬍鬚曾即時被認定係下屆特首大熱，而佢噚日有份頒獎嘅回歸盃，竟然由名為「準備就緒」嘅馬跑出，對未入閘就率先以金手搶閘嘅鬍鬚曾嚟講，好應景吓喎。
鬍鬚曾獲習總金手一握，即時人氣急升，噚日朝早喺特區政府搞嘅回歸酒會上成為「大紅人」，唔少人爭相上前「集郵」同佢影相，咁識貨嘅人包括幫港出聲召集人周融、曾經幫梁振英助選嘅亞視前主播洪綺敏、一班梁粉如立法會議員謝偉銓同埋前議員劉炳章，同場亦變身鬍鬚曾粉絲，兒科醫生李家仁亦同財爺selfie，齋睇受簇擁度仲以為佢已經做咗特首。
尖啤：阿爺大把心水
全國政協前委員劉夢熊（尖啤）話喎，習近平同鬍鬚曾握手係有特別含義，意指香港「唔係冇人頂上做特首」，事實大有人在，言即阿爺隨時搵到心水之選；民建聯葉國謙據聞都有份趁熱鬧握手，但問到第一握係咪政治祝福？葉國謙就覺得「諗得太多喇」。
而喺回歸日連趕幾場嘅鬍鬚曾，下晝應邀去到沙田馬場，同中央駐港聯絡辦副主任楊健以及外交部駐港特派員公署副特派員宋如安，一齊主持香港回歸盃頒獎。嗱，真係好蹺喎，呢場二班泥地1,650米賽事，跑出嘅頭馬叫做「準備就緒」，係大熱門嚟，咁啱鬍鬚曾亦喺習一握後特首行情看漲喎，由佢頒獎，夠晒應景。
李八方
mailto:[email protected]
