小弟唔係偏見，但好馬不吃回頭草，主帥能夠重返舊會而再次成功，例子真係唔多，摩連奴同納比都係異數。所以上年世界盃後，巴西再搵鄧加做教練，基本上已經唔多睇好；今屆美洲盃八強止步，都唔見得係特別令人失望嘅成績，畢竟真係對森巴兵冇咩期望。
好彩有集體感染病毒加上尼馬停賽呢兩個藉口，等鄧加都有嘢賴；不過，就算巴西過到巴拉圭，小弟都唔認為佢哋會過到阿根廷呢一關。咁坦白講，鄧加雖然戰術保守，好似堅持用雙防中，當年已經俾巴西球迷鬧到飛起；不過，睇番今時今日世界潮流，雙防中先至係大勢所趨，鄧加真係唔錯得晒。但佢點兵用人就真係保守得滯，用FC山東前鋒迪亞高泰達利同山度士前鋒羅賓奴，兩個都已經三字頭；唔係小弟睇小迪亞高泰達利，叻就唔使當打之齡去中超搵食啦，羅賓奴連意甲都踢唔掂返巴甲，仲有幾多貨賣，真係大家都知。
巴西係傳統強國，要數頂級前鋒，唔講比利呢啲傳奇，好似羅馬里奧、朗拿度、細哨……真係有排講，不過唔知係青訓系統問題，定戰術潮流帶動，巴西真係陷入前鋒荒；反而啲人才傾向晒翼鋒或者進攻中場，好似尼馬同菲臘比古天奴。記得迪亞高哥斯達選擇入籍西班牙，巴西足協仲酸溜溜講過國家隊大把呢啲前鋒，但睇番今時今日，就算唔用泰達利，侯克、費特同祖奧等唔通又好有料咩，唔錯嘅雷斯阿祖安奴又不被巴西重用。鄧加都嘗試變通，推利物浦新貴羅拔圖法明奴打箭頭，試一試冇正前鋒陣。不過點都好，堂堂足球大國搞到冇前鋒人才，真係笑死人。
文：牽牛