呢排街外係咁傳，《蘋果日報》稍後全面電子化，以後唔會再有紙媒。呢個係關乎八方飯碗、亦關乎香港民主前程嘅問題，所以噚日八方喺7.1遊行見到壹傳媒創辦人黎智英，問佢《蘋果》係咪放棄紙媒，肥佬黎回應：「唔會，唔會咁快死晒嘅」，繼而指：「唔會、唔會、唔會、唔會，大佬，你唔好亂噏啊」，佢仲話下年7.1遊行，梗係仲會有報紙，《蘋果》隨報附送嘅7.1海報「以後都會有嘅」。
單憑肥佬黎呢6個「唔會」，八方稍稍安心。至於《蘋果》幾時完全「無紙化」，肥佬黎話：「壹傳媒完全無紙，都會好多年後囉，我諗十零廿年後囉會，十零年後囉，希望。」有人話壹傳媒會由Next Media改名做Next Digital，肥佬黎話事前唔知道，重申：「我哋係做digital，但唔係唔做報紙」。