回歸18周年，特區政府如常喺噚日舉行升旗儀式，同時搞埋酒會。現任特首梁振英同太太唐青儀、身兼全國政協副主席嘅前特首董建華，以及多名政府主要官員都有出席，梁太以粉紅色上衣配黑色及膝裙登場，政務司司長林鄭月娥則低調着咗杏色連身輕紗裙。
或因涉貪案快有決定
心水清嘅人士都會留意到，特區三任特首中，曾蔭權冇出席喎，而刑事檢控專員楊家雄早前講到涉及煲呔嘅涉貪案時，話過3個月內會就案件有最後決定。咁到底係政府唔請煲呔，抑或煲呔因此決定no show？
民政事務總署回覆傳媒查詢時強調，當局一如既往有邀請曾蔭權出席7.1升旗禮，但佢早前已經回覆唔會出席咯。