一冇咗尼馬，巴西好似唔識進攻咁，喺美洲盃八強出局。點解足球王國變成一人球隊，好似走向沒落咁嘅？與其怪尼馬呢班90後接唔到班，倒不如話班80後唔爭氣，喺原本屬於佢哋嘅時代集體消失。
喺80至84年出世嘅年齡階段，巴西其實出咗唔少天才橫溢嘅進攻球員，包括阿祖安奴、朗拿甸奴、卡卡同羅賓奴，但佢哋都有個共通點，就係30歲唔夠就謝晒。講真，佢哋𠵱家都係30出頭，如果其中一、兩位仲有全盛期嘅七、八成功力，尼馬仲會獨力難支？甚至尼馬都仲未使擔大旗住，能夠喺卡卡同阿祖安奴身邊做個小師弟，慢慢接班；就好似千禧年初，啱啱冒起嘅細哨喺李華度同朗拿度帶住之下成長。
至於85到89年出世嗰班天才，就簡直威都冇威過，直接消失。呢個年齡層評價最高嘅新星有柏圖、路爾斯安達臣、盧卡斯、祖奧、拉美利斯……睇到呢啲名，真係無言，佢哋從來都冇接近過外界嘅期望；呢班人入面，發展得最好嘅已經係拉美利斯，變成一個中場工兵。祖奧、盧卡斯同安達臣都喺英超踢到冇晒靈氣，而柏圖就衰在技術未定型就去歐洲，加埋受傷太多。
每個國家都有人才多寡嘅高低潮，而巴西喺85至89甚至數到91年出世嘅年齡階段，都出現進攻球員真空嘅問題，係到尼馬同盧卡斯洛迪古斯呢一代先至有啲希望。喺舊年世盃同今年美洲盃，巴西前線應該老、中、青三代結合先至健康，但老嘅幾乎謝晒，中嘅冇出現過，單靠年輕一代，成績令人失望都正常。
文：咖喱