7.1遊行人數較往年大減，唔少泛民同建制中人都話意料中事，梗係啦，佔領運動消耗咗香港人咁多心力，而政改喺否決之時建制派仲要蝦碌出醜，市民都冇乜怒氣要消咯，諗諗吓，可能想喺假日休息仲好。花生友都好理解市民有咁嘅心態，但有泛民中人就話，希望支持民主派嘅市民呢次稍息過後，年底區選都要主動啲，記住用選票狙擊建制派。
呢位泛民話年底區選好重要，事關香港會唔會再被紅色勢力掩蓋每一區，視乎大家肯唔肯瞓身去投票。花生友相信對於中聯辦主任張曉明嚟講，呢場仗更加係不容有失。大家可能會噓花生友，唓，次次選舉對西環嚟講，都係咁重要㗎啦，今次又乜咁特別呢？如果咁諗，大家就錯嘞，事關今次喺區選前夕，建制派竟然喺政改投票甩晒轆，呢隻鑊，張曉明都肯定要同建制派一齊孭。
短期內唔會燉冬菇
有建制中人話呀，甩轆事件一定令張曉明file花咗，之但係有人傳佢要燉冬菇被調走呢，則肯定唔會喺短期內見到，至少區選前夕，西環唔會有人事大變動，以免被好事之徒大做文章。而既然張曉明會坐鎮區選，有建制中人話，區選會係張曉明補飛之作，若然佢可以好好協調到建制派，喺18區都打勝仗、議席較上屆有增長，相信都可以將功補過，唔使孭鑊。如此睇嚟，泛民支持者區選係咪會投票，直接影響張曉明仕途喎。
花生友