「冇波入又點喎？」阿根廷周二美洲盃準決賽大發神威，以6:1狂勝巴拉圭晉級，呢場入波仲多過之前四場總和。雖然入波名單冇美斯份，但唔緊要，呢位阿根廷「無價寶」 （PRICELESS）交出三次助攻，幫國家隊連續打入兩個大賽決賽。周六美洲盃決賽對智利，希望佢哋唔會好似上年世界盃決賽對德國咁黑仔就好嘞。
美斯自從分組賽對巴拉圭射入12碼後，已經連續三場交白卷，今仗再對巴軍，始終同入波無緣；不過唔緊要，佢助攻畀隊友一樣掂。15分鐘，美斯開出罰球，曼聯後衞馬高斯盧祖亂軍中射入，幫阿國先開紀錄；今場波美斯稍為墮後，但校炮一樣得心應手，27分鐘直線妙傳畀柏斯托尼射入，領先至2:0。
冇波入照當選最佳球員
記得分組賽阿根廷喺領先兩球下都俾巴拉圭逼和2:2，今場巴軍前鋒巴里奧斯喺完半場前為球隊追成1:2，阿根廷都咪話唔驚！所以吸取教訓後，阿根廷下半場繼續狂攻，靠迪馬利亞梅開二度，加上阿古路頭槌建功，遙遙領先至5:1；83分鐘，美斯送畀後備入替嘅希古恩埋齋，贏夠6:1。阿根廷三場分組賽加埋八強都係入得四粒波，準決賽一場就入夠六粒，球迷肯定收貨；美斯亦都成功上演「助攻帽子戲法」，仲大熱當選今場最佳球員㖭。
「決賽對智利有機會贏波」
美斯雖然四奪金球獎，但始終俾阿根廷球王馬勒當拿比下去，因為仲未幫國家隊贏過主要錦標；上年世界盃決賽錯失大好單刀，搞到俾德國加時搞掂，美斯仲係耿耿於懷㗎，佢賽後話：「如果我哋保持呢場水準，決賽對智利有機會贏波；雖然我賽前向上帝祈禱希望有波入，不過就算最後冇波入，我都唔會失望。」另外，外界以住對阿根廷教練馬天奴嘅評價唔係好高，但今次佢就創歷史，事關佢連續兩屆帶領唔同球隊打入美洲盃決賽；四年前佢帶巴拉圭入決賽，但最終大敗畀烏拉圭，今次帶阿根廷入決賽又會點呢？
識睇，一定係睇足英台【英波Live】：
http://soccer.appledaily.com
http://bit.ly/engballlive