踏入七翻身月份，中港基金互認昨起開閘，兩地基金可互相收客，會唔會帶動股市summer rally？望係咁望啦！不過，A股7月就未能開門紅，昨在場內場外孖展齊齊平倉下又大幅波動，收跌5.2%，報4053，睇嚟港股今日假後復市要繼續陪佢癲。
今年銷售料達標
睇返6月，最後3個交易日絕對驚嚇！上周五A股一度暴跌8.6%，收跌7.4%；周一高開2.3%後又暴跌7.6%，收跌3.3%，全日波幅10.1%；周二早段曾跌5.1%，但股災一小時就救熄，收市倒升5.5%，全日波幅10.7%。皆因中證監去槓桿搞出大頭佛，孖展斬倉引發上周五股災，人行周末黃昏急忙減息降準救市，可惜央媽放水不敵希臘收水，周一彈完即散，財政部漏夜倡議養老金30%可投資股票，加上市傳新股IPO暫停、股票印花稅下調、國家隊匯金百億元掃藍籌ETF等，姑勿論真定假，周二終於止跌回升。
市場一直盛傳恒生小型股指數100隻成份股將被納入深港通名單，醒目錢早前已偷步炒。小型股名單上，我的心水係深圳控股（604）。深控係深圳市國資委旗下最大房地產上市公司，穩陣度媲美內房兩大龍頭——中國海外（688）、華潤置地（1109），但估值相對偏低，中海外PE超過8倍，潤地更近10倍，深控只係7倍。
阿爺吹響救市集結號，似乎股市唔及樓市受惠。上周末央媽甫宣佈雙降，樓市即時見好，多個新盤熱賣，據《羊城晚報》講，廣州一個樓盤出現3,000人搶購。另外，國家統計局數據顯示，深圳一、二手住宅5月成交量分別環比增50%及28%，深控最受惠於深圳樓市轉熱。
深控土地儲備大約1,000萬平方米，超過四分之一位於深圳。首席營運官朱國強早前表示，深圳作為一線城市，又有前海及自貿區的憧憬，可望長遠穩定發展。他又指公司6月初配股集資27億元，將用於土地發展，包括補地價、向母公司購入資產，以及與深圳地鐵等合作。此外，公司首5個月合約銷售已經達43.6億元人民幣，有信心全年110億元人民幣的銷售目標可達。
深控近年經過整頓，脫胎換骨，業績佳、派息高；現時內地樓市復蘇，加上雙降可減低發展商和置業人士的負擔，對內房股有利，可趁低吸納。事實上，深控係近期跑得較好的紅籌，只因大市回落而不前，現價3.8元，PE7倍，息率4.2厘，NAV都4.582元。
割柑人
本欄逢周四刊登