小米嘅核心班底一向都係工程出身，最近終於請到人睇數，懸空兩年嘅首席財務官（CFO）職位，搵到國際創投基金DST前合夥人周受資過檔，由天使投資者變為打工仔。
小米突然請掌櫃睇數，外界當然關心小米係咪要籌備上市喇，不過主席雷軍再次強調「小米目前真心沒有上市計劃」，主要係小米已經有一定規模，需要有人幫佢規劃戰略、處理投資者關係，管理小米投資喎。
講番呢位新掌櫃，佢持有哈佛商學院MBA學位，之前喺高盛做過，喺DST曾經負責小米、京東、阿里巴巴等項目投資。
雷軍透過微博話，周受資喺小米初期就發掘出小米嘅價值，並且主導完成DST對小米嘅投資。周受資喺2011年小米發佈第一款手機嘅一個月後，就同DST創辦人Yuri Milner一齊決定投資小米。
雖然小米冇講今次係咪重金禮聘，但外界估計佢應該收到唔少股權，他日小米上市應該有得收割。