7.1遊行人數比往年少，照道理，政黨首當其衝受影響啦，事關捐錢嘅市民都會少咗㗎嘛。
好似民主黨咁吖，佢哋今年7.1雖然都有募捐，但冇好似其他政黨咁，特別製作7.1產品喺遊行期間為個黨籌款，但就印咗一批建制派肖像嘅扯線公仔貼紙、以及呼籲市民登記做選民嘅紙扇，周街大派特派。結果佢哋埋數後發現，今年籌到約16萬，較上年約20萬少咗4萬。
但公民黨嘅吸金力，卻不跌反升喎，可能因為佢哋推出多款雨傘產品有關，包括文件夾、毛巾同passport套，以及重推嘅黃色香蕉遮，結果埋單計數籌到43.5萬元，較去年41萬多2.5萬。