政壇出名風起雲湧，局勢瞬息萬變！財爺曾俊華於一眾司局級官員中，行事算係低調嗰位，近日佢代表香港到北京，出席亞投行的簽署儀式，當日國家主席習近平主動同佢握手，登時令鬍鬚曾人氣急升，事後有人形容呢個係黃金握手，曾俊華隨即畀人話係下屆特首大熱。
呢位忽然紅起來之財爺，今早在香港回歸酒會上成為「大紅人」，不少人爭相上前「集郵」與他拍照留念，到了下午回歸日沙田賽馬，財爺在馬場蒲頭，主持第八場二班泥地1650米香港回歸盃頒獎儀式，同場仲有多位中國駐港外交部同中聯辦人員在場，畀人一種好似群星拱照曾俊華嘅感覺，而財爺亦忙於同馬主等人握手，結果回歸盃跑出「準備就緒」好應景，該駒泥地六戰全勝，就如曾俊華民望亦全勝689，從未輸過畀梁振英。究竟曾俊華係咪準備就緒做特首，呢一刻真係佢知你唔知！