現代男女地位對等，男主外女主內的過時觀念已日漸模糊，女人嫁人後又怎會甘心做主婦服侍老公子女?自言是工作狂的莫文蔚（Karen)與德國籍丈夫Johannes結婚將近4年，婚後Karen在工作上依然拼搏，兩公婆經常分隔異地，今年9月她又將舉行巡迴演唱會，至少半年時間冇得見面，但Karen卻喜歡小別勝新婚的感覺，返到英國Karen就變身平凡人妻，萬能的丈夫更為愛妻下廚煮愛心餐，總之兩公婆一條心，又何需天天見？
統籌：林妙萍
撰文：顏英儀
攝影：林德雄
化妝：Kerry Wong of ZING the make up school
髮型：Carr Cheng of Pop Eight
場地：Cocotte （中環善慶街）
近年圈中女星多嫁老外，包括莫文蔚的好友梁詠琪，還有李玟、周汶錡和官恩娜的另一半都是外國人，為何她們不揀港男嫁老外？Karen說：「其實世界一路喺度變，唔單只係圈中藝人，其實世界已經越來越冇咩界限，你去接觸唔同地方嘅人同文化，或者去唔同地方工作嘅機會都多咗，唔同上一代，所以同來自唔同地方嘅人結婚一啲都唔出奇。」
小別勝新婚
今年11月是Karen與德國籍丈夫Johannes結婚4周年紀念，丈夫上一段婚姻有三名上大學的子女，做繼母的Karen對生B興趣不太大，寧願過二人世界，婚後對工作仍充滿熱誠憧憬，雖然兩公婆婚後聚少離多，但這對相識近30載的初戀情人卻是心靈相通，「我哋默契好好，當然都會掛住對方，有一種辛苦，但小別勝新婚，工作以外仲有家庭同老公都好重要，目前可以繼續保持呢個狀況，因為佢做嘢都好忙，而我工作就排得密密麻麻，要盡量抽時間過吓二人世界，見唔到面惟有靠電話同短訊維繫感情，已經好好彩，如果20年前要靠寫信根本冇可能。」
老公遷就我
工作上Karen一向予人女強人的感覺，在丈夫面前可會變回小鳥依人？「哈哈，喺屋企我都係女強人，老公遷就我多啲，我唔係要話晒事，兩公婆有商有量，我哋實在太了解對方嘅性格，由17歲識到𠵱家，佢好識點handle我。」問Karen會給自己做太太角色多少分數？她二話不說：「梗係爆燈啦！」婚後Karen以香港和英國為家，在英國回歸最平凡的人妻，「通常都係老公煮畀我吃食，佢鍾意煮意大利菜，喺英國就過好普通嘅二人世界，老公放工後就一齊買餸返屋企煮飯，得閒睇吓舞台劇，過好普通嘅生活。」自去年莫爸爸突然過身，Karen在香港已搬回娘家跟母親住，希望盡孝道陪母親，「呢一年搬返屋企住，好似做番十幾歲做女時候嘅感覺。」
繼「莫後年代」世界巡迴演唱會後，相隔大半年，Karen再次宣佈即將舉辦「看看世界巡迴演唱會」，巡唱將於9月19日在台北小巨蛋展開，原來Karen是首位香港歌手第三次在小巨蛋開演唱會，認真犀利！今次tour將馬不停蹄唱到明年初，她還會擔任演唱會總監，「台北之後就會巡迴到內地，演唱會的檔期已排到明年1月中，所以好期待又緊張，上一個演唱會就喺劇院嘅concert hall，好唔一樣，今次就返體育館搞，希望可以有更多豐富視覺效果帶畀觀眾。」
想演舞台劇
巡唱已排到明年年初，現正密鑼緊鼓地宣傳，那丈夫點算好？Karen即大叫說：「好驚呀！演唱會喺香港綵排，一開始就要每個禮拜表演，所以應該有半年時間返唔到英國，𠵱家都唔知點算好，要老公諗吓辦法。」近年Karen投入較多時間於音樂事業，甚少拍電影，對上一套電影是上年上映的《催眠大師》，她說：「呢幾年都係做音樂為主，之前忙完演唱會，又出碟，嚟緊9月做tour，時間有限，我想專心做好每一件事，拍電影始終比較被動，睇你遇唔遇到適合自己嘅劇本，有機會希望自己可以再演舞台劇。」
【瘦底慳妹】
45歲的莫文蔚狀態keep得好，出道時僅得22吋纖腰，身形和腰圍沒有隨着年月增長，到了今天Karen仍然是22吋纖腰，廿年不變，個子雖然不高，但勝在擁有黃金比例，Karen說：「真係咁多年都冇變過，要多謝媽咪，我哋一家天生瘦底，平時好少做運動，𠵱家仲着住十幾二十年前嘅T恤牛仔褲，甚至連媽咪後生時着嘅旗袍我都會攞嚟着。」
更多精采時尚內容，盡在 http://add.appledaily.com 。