有人喜歡甜，由紐約嚟到港開舖嘅精品蛋糕店噚日開幕，吸引大批粉絲排隊搶購，有啲人未開門已經排隊等緊，結果每日限量100個嘅蛋糕話咁快就賣晒。嗰間店嘅千層蛋糕被美國雜誌《Bon Appétit》選為美國10大蛋糕，芝士蛋糕都獲《New York Magazine》評為紐約最佳芝士蛋糕㗎。
咁受歡迎梗係有來頭，間蛋糕店Lady M不嬲俾人叫做「名媛甜點」，喺美國、韓國、新加坡都有分店，而海港城店開幕前，已經有唔少名媛、藝人搶先試食，跟住仲喺facebook放閃。噚日朝早已經有幾十人在等緊，成日人龍無斷過。蛋糕店董事總經理Stephen Yeung話，外賣喺下晝4點已經停咗，8點嗰陣100個蛋糕賣清光。
最受歡迎嘅招牌原味千層蛋糕（Signature Mille Crêpes），由唔少於20層薄到好似紙嘅法式班戟整成，仲將頂層烤到金黃色，費清諗到都流晒口水。其他仲有檸檬千層蛋糕、法式芝士蛋糕等。蛋糕每個賣450至750蚊，每件則賣58至75蚊。
＃要生計，也要生活 ＃毋忘初衷
費清