每逢股災，各種好淡角力、大鱷搵食的傳說就會四圍流傳。今次A股重創，市場當然亦忙着找「罪魁禍首」，好讓投資者有出氣袋，阿爺亦有矛頭可指。首當其衝的，是負責清理場外孖展的中證監，主席肖鋼今鋪真係水洗都唔清，內地輿論指他辦事不力，打壓場外融資力度過狠，終打出個禍來，網民譏笑他快要到上海IFC天台謝罪了。
另一在內地朋友圈中瘋傳的，是「外國勢力」論。故事頗天馬行空，就是有外國資金透過RQFII、滬港通、合資企業等途徑「慢慢流入中國」，滙合起來造空A股，所以今次股災不是「技術收復」，而是外資陰謀，中央已決心「打這場大仗」了。
海迪數位「外國勢力」buy-side朋友，看完這分析，無不大嘆：「我都想short到呀！」除咗short A股ETF外，offshore投資者仲有咩有效方法可沽空A股？股指期貨、場外融券，皆可用來造空，但均只限onshore、即國內投資者玩。即使有海外基金用盡手上RQFII，規模亦有限，以A股每日過萬億成交來說，遠遠未至於能隊冧個市。
聞說A股早前的確累積不少淡倉，但市傳其實是「自己友」所為，就是看中證監打孖展覺得有利可圖，順勢而為而已，誰知連鎖效應一發不可收拾。內地股市九成是retail driven，如今有人祭出「外國勢力」來忽悠小股民，輕輕鬆鬆又收工！
呢個世界，所有問題都係「外國勢力」或「土地唔夠」的問題，真係唔該晒。
海迪