臨近季尾，賽事水準難免低啲，好似今期（1日）第五場四班1400米，14駒中只得「美麗里程」及「常妙星」一對今季曾經喺四班贏過，呢對馬近期陣上走勢仍然唔錯，相信會係今場爭勝要角。
其中「常妙星」嘅高貴女馬主朱明雅，乃「新妙星」富豪馬主葉克勇嘅太太，佢哋全力支持練馬師霍利時，由於「新妙星」已加到80分好盡吓兼已七歲，前途未明，霍利時想為葉氏夫婦再建功，基本上家陣只可以靠「常妙星」。
睇番「常妙星」，季初贏同程1400米，一條直路連追十多駒，勁到無倫，相信大家仍記憶猶新，之後連場作出回氣，但近三仗跑略長嘅谷草1650米，都同樣追得近，可見已經回氣完畢，鬥心及體力仍在，今次出王牌跑番1400米，睇嚟又到起筷時候。
至於朱明雅嘅對手，除咗「美麗里程」要重視外，有一個老婦絕不能睇低，所講嘅「老婦」唔係指馬主，而係8歲年老雌馬「勝捷勝」，佢雖然老但戰鬥力唔差，季內攞過冠亞季各一成績，大前仗遇翻版步步友「澳斯卡」亦輸唔遠得第四，之後兩仗跑冇根據嘅泥地，不能作準，今次跑番草地，隨時係「常妙星」贏馬嘅絆腳石，所以朱明雅一定冇情講照砌！