港台噚日公佈本年度香港書獎，搵咗前律政司司長黃仁龍（圖）做其中一位頒獎嘉賓。司儀問到黃仁龍有冇興趣寫書做作家，佢就話有機會都想出書做個記錄，不過就唔講政治。
黃仁龍話，自己做律政司司長嘅時候，只係負責管法律工作，完全同政治扯唔埋，「你叫我寫都冇乜用」；就算要寫，都只會寫自己7年嚟，點樣係一國兩制之下維護法治嘅經驗，又或者分享吓以前做扶貧嘅真實故事，希望年輕人睇完對香港多啲關懷。
區家麟《傘聚》得獎
今屆香港書獎有12本得獎作品，其中就有傳媒人區家麟寫嘅《傘聚》，獲評審評為「平實、公允、可觀」。區家麟話舊年佔領有好多歪理同荒謬嘅事，自己只係記低個人嘅經歷，希望十年廿年後香港人回頭睇番，會係一個公允嘅歷史紀錄。