周三(1日)沙田戰馬中，只得一匹於這天在沙田馬場大圈快跳，就是第八場二班1650米泥地的「王者無敵」，由助手跳兩段，原來這是此駒近11日內，第6課出跳，包括上周四於草地打磨，備戰異常積極，而練馬師高伯新這天亦有動靜，傍到「王者無敵」實一實，操完跟隨隻馬返倉，一邊睇馬一邊向助手問長問短，以了解該駒嘅最新狀態水平，擺明對今戰高度重視。
「王者無敵」上場初跑泥地，配韋達角逐1800米，放到直路散晒大敗，賽後韋達被馬會查問，佢話認為以「王者無敵」的動作，顯示較適合角逐草地，會強烈建議馬主及練馬師，考慮畀隻馬回師草地賽，但高伯新似乎唔領情，今次繼續畀「王者無敵」跑泥地，但就縮落1650米。賽前更由韋達再試泥地大閘，進行考閘並順利及格，但最終韋達冇騎，「王者無敵」換上蔡明紹，而韋達呢場就似係從「王者無敵」、「豈等閒」、「左右逢源」中，三揀一揀咗「左右逢源」出賽。
表面上「王者無敵」有疑點，但睇佢操得咁辣及堅持出王牌再跑泥地，似乎高伯新有相當把握及期望。何況要留意「王者無敵」在港兩戰一哩或以下全有獎金，相反四戰1800米或以上則表現欠佳，話唔定上仗泥地1800米只輸在路長，今次跑1650米咪睇小呀！