正當網媒如雨後春筍，個個立場先行喪抄襲新聞為呃like；主流傳媒轉攻即時資訊浸死讀者博hit rate，TVB前記者吳曉東就想重振傳媒公信，決定透過網上籌款，成立首間屬於香港人嘅通訊社Factwire（事實傳真通訊社），希望由今日起，用兩個月時間，透過cloud funding籌300萬。
冇大股東 唔收廣告
如果成事，呢筆款項夠請7位調查記者做15個月，專攻深度調查報道、大型數據分析。佢哋嘅調查報道，首年會先免費送畀主流傳媒採用，十多小時後先至原文放上網站。
為防好似主場新聞咁，因為一個人而一夜消失，Factwire唔會有大股東，人人捐款，最少幾10蚊、最多捐10萬，捐一萬元以上就可以成為永遠名譽聯合創辦人，但不能干擾編採運作。通訊社亦唔會收廣告，以確保不受廣告商干預。吳曉東認為，傳媒生態現以生產即時資訊為尚，令自己有空間做多啲調查報道，亦可以留住資深記者。