當西環主任張曉明都話，建制派WhatsApp洩密風波應該到此為止，換言之，西環都知邊個係嫌疑犯，其他建制派應該同小明一樣收聲以免再惹風波。點知民建聯鍾樹根卻慌死外界唔知邊個係內鬼，噚日喺電台度爆料，話放料嘅係獨立無黨派兼着短褲嘅人士，除非盲咗，否則冇人會估唔到，唔通佢哋有仇？
謝偉俊快閃拒回應
噚日Tree根喺電台節目中話，中共方面應該已經知道邊個係內鬼，所以先叫大家唔使捉：「上大人講話唔好捉，即係捉咗囉」，繼而就展現佢敢言作風，話據知嗰位內鬼應該同自己一樣，係口沒遮攔，但𠵱家已經變乖。當被問到嗰位內鬼係咪獨立人士？Tree根話自己懷疑係；至於係咪着短褲㗎，佢冇否認，仲話：「你都講到好明喎」，話對方「着短褲好型」。
睇番資料，建制派着短褲開會嘅人士中，包括盛傳係頭號洩密嫌疑犯嘅謝偉俊。噚日朝早八方都有問阿Paul點睇？阿Paul話冇留意到，八方轉告鍾指洩密議員係獨立議員同着短褲好型後，阿Paul隨即大笑：「我已經講咗我要講嘅嘢，我唔想再有乜嘢回應。」Tree根咁係咪有啲唔公道？阿Paul話：「我哋條line（口徑），我哋亦都講咗，我哋唔想再就呢件事再作評論。」會唔會唔開心？佢話：「唔緊要，我哋會適當地處理呢個問題」，然後快閃，似乎行動說明一切。
李八方
mailto:[email protected]