港區人大代表早前喺WhatsApp內部群組，大鬧建制派竟然缺席政改投票，其中愛國歌手張明敏好鬼激，形容事件令建制派「無晒面呀」，繼而批評立法會係「垃圾議會」。噚日張明敏現身鄉議局搞嘅慶回歸酒會，火氣似乎已經全消，而且仲同身兼人大兼立法會議員嘅吳亮星搭晒膊頭friend住影相，話已經無嘢啦，唔知係咪西環已經呵番呢班愛國人士。
林鄭扶住發叔
同樣係人大代表嘅工聯會鄭耀棠就話，一早提過啲人大代表，咪喺WhatsApp「講呢啲」個人感覺，而佢自己，永遠只係簡單回覆，保密工夫做到足。
雖然建制派因為等埋發叔而蝦碌冇投票，令政改一役鬧劇收場，但專責政改嘅政務司司長林鄭月娥，噚日去到鄉議局都同當日抱恙在身嘅劉皇發言談甚歡，仲不時咬耳仔，兼且間中扶住發叔，似乎冇嬲到呢位疑似被建制派擺上枱嘅新界王喎。相反同場嘅特首梁振英，全程獨家村，冇乜人同佢傾偈。