上星期在街上撞到一位中大校友，屬馬迷之一，佢竟然心水清到問：「喂，中大人之中，新亞佬最鍾意養馬，馬主人數為中大幾間書院之冠，仲有一個新亞校友賽馬團體㖭，七月一號呢個團體隻新馬『一片光明』跑千二米，有冇機會先，上次一出即勝一千米，好似好有潛質咁噃，會唔會係霎眼嬌呀？」
既然問到，不妨有話直講：「『一片光明』來價便宜，並非因馬血統差，而係生得細隻，兩歲馬，只得九百七八十磅，而且係短途馬血統，一般相馬理論認為細隻馬只宜跑長途，跑短途欠缺爆炸力，故此『一片光明』在拍賣會冇乜人吼。但往往世事無絕對，此匹新馬有天生速度，步伐洶湧，在香港一出就贏，而且贏得輕鬆，確係令馬主產生美夢嘅。今日嚟講，『一片光明』晨操正常，保持狀態，對手皆是蹄下敗將，不知數就係初跑千二，要轉彎，是否適應呢？洪金寶大哥隻『崇山寶』跑一千米冇得頂，偏偏跑千二就唔多掂，就係因為轉彎論盡之故。估計『一片光明』會係臨場大熱門，對手係上次贏一千米時嘅亞軍季軍，即6號『綫路神駒』與4號『平民百勝』，尤其係後者操到火紅火綠兼抽到第一檔，有好大威脅力。此外，蔡神仙啲新馬通常有高質，佢隻7號『魔連奴』試閘前速飛快，唔知係乜料，唔敢睇死。」
貼士就係咁多，新亞佬自不然希望「一片光明」勝完再勝。上到陸羽，餐飲M代一位世姪L派一本新書，話係搭飛機貼士喎。甚麼貼士呢？點樣成日坐飛機頭等位周遊列國呀！有咁筍貼士？自不然要望吓。世姪L在哥倫比亞大學畢業，啱啱出版咗一本小書《How to fly first class with miles and ONLY $5》由Pointdozer出版。世姪L係富三代，阿爺阿爸有大把銀両，但爸爸係識慳儉之人，一向應使即使，絕不會俾錢個仔搭頭等艙嘅。世姪L不用屋企錢，一味用信用咭飛行里數去換頭等機票，呢本書就係佢嘅親身經歷，教年青人點樣儲蓄酒店里程、航空公司里程、信用咭里程，怎樣兌換機票等招數（tricks），世姪L就憑呢啲招數，在哥大讀書期間，不用父親銀紙買機票，孭背囊上路，搭頭等飛機暢遊倫敦、巴黎、西雅圖、關島、檀香山、檳城、洛杉磯。左丁山睇完，當然唔慣捐窿捐罅上網搵着數，年輕人則不妨一試，呢本書列出61個互聯網連結（links），俾讀者自己上網搵折扣、優惠。呢本書不知在香港是否有售，有興趣嘅，請上Pointdozer網。