人氣蛋糕Lady M近日備受港女追捧，但另一港女最愛、法國名牌Le Creuset廚具仍具人氣，就連地獄廚神官恩娜（Ella）都加入搶煲一族，前晚Ella在社交網自爆陪朋友去買煲：「佢話嗰個法國煲做緊半價，身份證號碼有個5就可以買！平時用生果刀切牛肉嘅我零興趣咁陪佢入到舖頭，只係一直企喺一邊心諗有冇咁誇張呀？啲人好似唔使錢咁搶！」
結果Ella由陪客變搶家：「之後一路企一路聽啲人講有幾正！半價真係抵到喊！之後我唔知點解就帶咗3個返屋企……希望可以令我更加努力學烹飪啦！」有網民笑她用生果刀切牛肉，另有網友指希望撞Ella求合照，她鬼馬留言：「我大肚呀，細細力撞吓好嘞！我怕動胎氣！」
撰文：皓騫