之不過係遲到啫，花生友相信，縱橫政壇咁多年嘅新界王、鄉議局前主席劉皇發都冇諗過，會搞出咁大風波。其實政界中人最關注嘅，當然係發叔張票，係咪真係咁重要？質疑政改方案都一定唔過，有乜理由為咗一個人而冒咁大風險？花生友聽聞，唔少政界中人都話，如果遲到嘅唔係發叔，一定唔會蝦碌，事關大家等埋嘅，可能係新界嘅選票。
有建制中人同花生友講，其實經民聯林健鋒堅持要等埋發叔張票，都不難理解，因為中央真係落咗柯打要齊腳投票，而林健鋒身為經民聯副主席，仲要係負責聯絡發叔，點可以甩飛？之但係民建聯點解要陪經民聯一齊癲，好多人都話唔明喎。
區會選舉爭鄉事派支持
花生友都去八卦過，得到嘅答案係若然此人唔係發叔，民建聯一定唔等埋，事關發叔嘅本錢，就係喺新界有啲影響力，嚟緊嘅區議會選舉，如果有鄉事派支持，肯定事半功倍，有人話譚耀宗以至葉國謙，為咗幫兄弟保住選票不失，所以都覺得等埋發叔無壞，只不過勢估唔到，等出個大頭佛出來，未得票或者先失票啫。有人仲同花生友講，當日有啲建制派獲悉，發叔好快就到，政府仲派咗一位非政制局嘅政助落去立法會大樓地下等發叔埋位，但發叔卻係遲遲未到，令政府都估計錯誤，真係唔知有人計錯車程、抑或有人隨口噏當秘笈。經一事、長一智，市民今日上街，唔等埋發叔咯。
花生友